舒適點心店

今日拎咗半日假覆診，老公咁岩又放假，一於扮過退休生活，齊齊去嘆早茶。

齊齊去嘆早茶

光鮮企理，好乾淨

地方闊落

店舖裝潢光鮮企理，好乾淨。地方闊落，有舒適嘅卡座、梳化座，仲有幾張大枱。

點心選擇好多

點心選擇好多，有蒸點、腸粉、包點、蒸飯、煎炸、蔬菜、甜品、飲品等，中午仲有客飯。先開壺普洱（$7/位），香濃甘香，解渴解膩。早茶和下午茶係孖寶優惠時間，點菜紙上嘅粉紅字都係孖寶點心，我地點咗兩份孖寶。

姜汁千層糕好夠味，又唔太甜

蜜汁叉燒腸皮薄滑饀靚

淋上豉油更好味

姜汁千層糕（原價 $22 ）及蜜汁叉燒腸（原價 $25）為 孖寶價（$41）。姜汁千層糕軟、黏、彈，未食已聞到姜味，好夠味，又唔太甜，推介！蜜汁叉燒腸皮薄滑饀靚，份量足，叉燒鹹香嫩口，仲加咗啲芫茜，好香！

黑椒金錢肚爽腍入味

黑椒香辣唔會太勁

奶皇流沙飽圓碌碌，脹卜卜

流心狀剛好，香滑甜美

黑椒金錢肚 （原價 $27）及奶皇流沙飽（原價$22」 都係孖寶價（$41）。黑椒金錢肚配有幾件腍嫩入味嘅白蘿蔔。金錢肚爽腍入味，黑椒香辣唔會太勁，好食！奶皇流沙飽圓碌碌，脹卜卜，好靚仔！包身軟熟，一咬開，流心狀剛好，香滑甜美。

贊記蝦餃皇脹卜卜，用料十足

爽彈嘅蝦肉、荀粒

另外再散點一些非孖寶但又好想食嘅點心。贊記蝦餃皇($32/4隻）透薄柔軟嘅外皮包着爽彈嘅蝦肉、荀粒，脹卜卜，用料十足。

蒜蓉蒸龍躉好有蒜香

又白又滑，食到魚鮮味

竟然有蒜蓉蒸龍躉 （$47），馬上眼發光。又白又滑，食到魚鮮味，墊底嘅豆卜索晒蒜香，好正！

白灼油菜心翠綠爽嫩，好新鮮

白灼油菜心 （$19）每條都係芯，翠綠爽嫩，好新鮮，少油少鹽，蠔油仲要分開上，岩晒我，健康有益。

 

店名：新贊記點心皇

地址：太子荔枝角道33號百匯軒地舖