真係吃到好飽

男朋友生日，本來想親自下廚，但真係超忙，所以都係出去食，乾手淨腳。佢生日佢話事，佢話天氣涼涼地最岩打邊爐。

門面光鮮明亮

環境光猛

有闊落的卡座

坐得幾舒服

餐廳係新店，門面光鮮明亮，仲鑲咗各份餐牌，好清楚！內裏環境光猛，乾淨企理，有闊落的卡座，亦有二至四人枱，座位唔好，但枱和枱之間都有距離，坐得幾舒服。

三個套餐

50多款火鍋配料

有三個套餐，佢省住我荷包，揀了最實惠的Prime Grade 牛肩胛肉及西班牙無激素豬肉片（成人$288）。雖然最經濟，但超豐富，除咗任食兩款肉外，仲有50多款火鍋配料和15多款飲品任飲任食，而最緊要係有杯Movenpick雪糕做飯後甜品，正呀！

任飲台式飲品

熱愛文芒果茉莉花茶和熱水蜜桃紅茶都甜美滋潤

叫定兩杯台式飲品準備下先！男朋友要咗杯熱水蜜桃紅茶，味道甜美，好滋潤；我就要杯熱愛文芒果茉莉花茶，好有芒果的酸甜，又有茉莉花的清香，好開胃，岩晒！

 

火鍋湯底有15款

蕃茄濃湯豆腐雜菌涮涮鍋好好飲!

湯料好豐富

飲咗幾碗

火鍋湯底有15款，要咗個蕃茄濃湯豆腐雜菌涮涮鍋，貪佢清清地。湯料有滑嘟嘟豆腐、多款鮮爽的菇菌、清甜的粟米、油揚豆腐、蕃茄、紫洋蔥、凍豆腐等，湯底清香，茄味極及香濃，酸咪咪好醒胃，好fresh! 結果飲咗幾碗，好好飲!

Prime Grade 牛肩胛肉及西班牙無激素豬肉片肉質都好鮮紅

牛肩胛牛味香濃

沙茶牛肉又嫩滑又入味

幾厚身

Prime Grade 牛肩胛肉及西班牙無激素豬肉片肉質都好鮮紅，仲有雪花紋，好新鮮！涮一涮，肉嫩鮮美，牛肩胛牛味香濃，乜醬料都唔駛用，原汁原味，男朋友encore咗幾次，仲不停話好味。豬肉片都係好嫩，又唔肥，好鮮香。沙茶牛肉都好正，幾厚身，又嫩滑又入味，得!

自家製手工餃和多款丸類都好特別

全部中間都有饀，配搭好新鮮感

黑松露芝士豬肉餃竟拉出芝士，芝味滿分

任點配料有七大類，多款丸類都好特別，無乜見過，要咗芝味十足的蘑菇芝心堡、牛味香濃的爆醬濃芝牛丸和啖啖芋香的芋泥貢丸，全部中間都有饀，配搭好新鮮感，仲好好味！自家製手工配料類就要咗黑松露芝士豬肉餃，包得幾靚仔，仲皮薄饀靚，啖啖黑松露香，竟拉出芝士，芝味滿分，整體好夾。 

足八吋長巨蟹棒好有份量

吸咗湯，好味！

火鍋配料類就揀咗足八吋長巨蟹棒。嘩！好有份量，吸咗湯，好味！

海鮮揀咗四款

全部好味到要encore!

海鮮係我目標，六款揀咗四款，哈！生猛海蝦又爽彈又鮮甜，夠晒新鮮；鮮魚片好嫩滑鮮味；帆立貝中等size，好彈牙！深海魚柳啖啖肉，同樣嫩滑。全部好味到要encore!

蔬菜類好新鮮！

蔬菜類都唔可以少，要咗唐生菜和羽衣甘藍，好翠綠爽嫩，新鮮！仲有好滑身鮮支竹，有豆香。紫心蘿蔔就好少見，味道清甜，喜歡！

零添加有骨炸魚皮脆卜卜

炸物類就要零添加有骨炸魚皮，男友鍾意脆卜卜就咁食，我就會涮耐一點，半脆半腍的口感好特別。 

仲有Dreyer’s 和HaagenDazs揀

Movenpick口味

Movenpick楓葉糖合桃味雪糕香甜；Dreyer's 宇治抹茶十勝紅豆雪糕茶味香濃

最後緊係要食埋雪糕，原來除咗有Movenpick，仲有Dreyer’s 和HaagenDazs揀。要了杯Movenpick楓葉糖合桃味雪糕，又香甜又幼滑，亦要了杯Dreyer’s宇治抹茶十勝紅豆雪糕，茶味香濃，又唔太甜，好好味!

 

店名：小鍋霸

地址：將軍澳貿業路8號新都城中心2期UG樓UG051F號舖