成日都想吃: 5月 2022

2022年5月30日星期一

平靚正!

好耐沒有去石門，每次入石門都係因為周身骨痛，要去找醫師針灸，今次都唔例外，嗚……針完之後不單止全身散晒，肚仔仲餓到扁晒，見附近有間搶眼的冰室，平靚正，醫肚先！

平靚正

好多擺設品

幾大，坐得幾舒

冰室都幾大，坐得幾舒服，環境光猛，見到四處放了車仔、人仔、公仔、船仔等擺設品，整齊企理。

選擇勁多

厚厚的餐簿，選擇仲勁多，有鐵板扒餐、廚師推薦、Set dinner、泰越巡禮、一哥焗飯、小食、特飲等等，中西泰越都有齊，樣樣都有，唔驚無嘢岩食，反而驚選擇困難症發作，哈！

霸王花豬骨湯好足料，好夠火喉

在廚師推薦中揀了麵醬茄子魚腩煲配中式老火湯、白飯和熱飲（$98）大大煲，份量好足。是日中湯是霸王花豬骨湯，熱辣辣上枱，舀起湯料，內有瘦肉、紅蘿蔔、霸王花、南北杏等，好足料，味道濃郁，好夠火喉。

麵醬茄子魚腩煲大大煲，份量好足

魚腩外脆肉嫩，啖啖肉

茄子皮保持光亮

麵醬茄子魚腩煲熱度十足，仲幾辣口添! 味道鹹香，用來佐白飯最岩。茄子皮保持光亮，皮肉都咁嫩滑；魚腩經炸過，金黃脆口，外脆肉嫩，啖啖肉，好食!

菜心炒牛肉大大碟，好滿足！

牛肉入味

菜心翠綠爽嫩

菜也不能少，再點了一碟菜心炒牛肉（$88），加了甘荀、草菇、大大碟，好滿足！炒得好夠鑊氣，菜心翠綠爽嫩，而牛肉就有咬口，但不嚡口，烹調入味。

熱檸樂酸酸甜甜，飲落幾舒服

熱檸樂(+$10)暖笠笠，內有三四片檸檬，味道酸酸甜甜，飲落幾舒服，如果加埋薑就絕配!

店名：第五街冰室

地址：沙田石門安群街1號京瑞廣場2期地下G08號舖

2022年5月28日星期六

「蠔」食拉麵

大阿哥最喜歡食拉麵，所以每次約他都不用傷腦筋，只要搵間好食的拉麵店就得啦! 今晚又齊齊食拉麵。

門面好醒神

座位都幾多，寬敞舒適

設計色彩繽紛，很搶眼啊

店子門面佔地挺多，紅彤彤門面，還鑲有閃亮電泡，令人醒神，驅走內心的悶氣。內裏設計成「小屋」般的吧枱座，而望向“小屋”則設有多張兩至四人枱，座位都幾多，寬敞舒適。而最吸引我就是「屋頂」的設計，掛了多幅菜式的大圖畫和一排排日式燈籠，色彩繽紛，很搶眼啊!

都幾齊備

石燒飯、丼物

餃子、揚物

主打拉麵

看中期間限定系列

枱上放齊餐具、紙巾、檸檬水、調味料、餐牌和點菜紙，都算幾齊備，而調味料分別有餃子汁、七味料和炸蒜。餐店除供應拉麵外，還有餃子、揚物、石燒飯、丼物、追加配料、甜品和飲品，選擇不少。我倆第一時間就看中期間限定系列，齊齊開心share。

***************************

廣島牡蠣漬醬油拉麵大大碗，好滿足!

啖啖蠔鮮味

麵條口感適中

廣島牡蠣漬醬油拉麵 Marinated Hiroshima Oyster Shoyu Ramen 加味玉 Flavoured Egg ($128+$10) 有四大隻廣島牡蠣、一些青香的京蔥和青嫩的菠菜，大大碗，好滿足! 湯面泛少少油光，趁熱馬上呷一口，啖啖蠔鮮味，正! 麵條屬幼身，口感適中，不會太硬又不會過腍，舀一羮和湯同吃，配搭更美味。

相當肥美

味玉富蛋香，烹調入味

四隻蠔都相當肥美，鮮嫩之餘亦富有蠔汁，蠔鮮味濃。而我最愛就是味玉，吃拉麵不能沒有它，所以必定追加! 咬一口，嘩! 流心狀極佳，鮮黃的蛋黃汁相當亮麗，好吸引! 全隻蛋都相當黏滑，亦富蛋香，烹調入味，正!

***************************

廣島牡蠣漬薑汁石鍋釜飯熱辣辣，香噴噴

廣島牡蠣漬薑汁石鍋釜飯 Marinated Hiroshima Oyster Pot Rice in Ginger Sauce ($95) 以一個厚厚的石鍋盛載上枱，的確可一直保持其溫度，吃到尾聲也暖笠笠，正! 上枱時，熱辣辣，香噴噴，飯面舖了四大隻島牡蠣、一隻鮮橙亮麗的生雞蛋，還有大量京蔥和蔥花，賣相吸引。