友人對米線情有獨鍾，而我就無乜特別，無話喜不喜歡，所以我不會抗拒陪他吃他的喜愛，今晚就來到這間主力米線的小店。
 |
| 紅黑白三色配搭，睇落好光鮮 |
 |
| 大大張的菜式相片好吸引 |
 |
| 整齊企理 |
紅黑白三色配搭，令小店在這條街巷中挺突出，睇落好光鮮。內裏整齊企理，睇落好似車廂的設計，而牆上大大張的菜式相片好吸引。兩邊泊牆是二人卡座，而中間就是六人長枱，坐位不算多，但出入通道幾闊落。
 |
| 可任添飯或米線，真係唔會餓住走 |
 |
| 選擇不多，但幾有特色 |
 |
| 飲品 |
餐簿也是以紅白色為主，分了五大類，清晰易明，有湯米線/泡飯、拌米線/飯、葱油餅、小食和飲品，選擇不多，但幾有特色。而每點一客主食加$18就可升級至套餐，有小食半例和飲品，可食得更豐富。如果仲唔夠飽的話，仲可任添飯或米線，真係唔會餓住走，哈！
***********************
 |
辣椒炒肉拌米線大大碗，面頭放滿食材 |
 |
| 吃前拌勻，米線沾上不少辣椒籽 |
 |
| 香辣惹味 |
選了一客
辣椒炒肉拌米線 Rice Noodles with Stir-fried Hot Pepper and Pork Belly （$58），面頭放滿腩肉、青辣椒、炸鷹咀豆和蔥花，大大碗。吃前先拌勻，米線白滑，沾上不少辣椒籽，香辣惹味，連埋青椒仔一齊吃，辣度進一步提升，正！腩肉肥瘦相間，炒得香口，食落唔覺肥，但我更喜歡是炸鷹角豆，脆卜卜，好香口！
***********************
 |
| 酸菜脆鯇魚湯米線越喝越火辣 |
還有我倆都喜歡的酸菜脆鯇魚湯米線 Crispy Grass Carp Noodles with Pickled Mustard Green Broth（$58）。舀起一看，內有不少酸菜、青紅辣椒等香辣配料，而湯亦泛了一些辣油，看來辣度不弱。馬上試呷一口，熱辣辣，味道沒有預期中那麼酸，只是微酸，辣度真的不弱，辣中帶點酸，仲越喝越火辣，亦越喝越滋味。
 |
| 脆肉鯇爽口鮮味 |
 |
| 湯連米線同吃，最滋味！ |
米線同樣又白又滑，因掛湯力不強，故我較喜愛舀一羹湯連米線同吃，最滋味！魚肉的份量不少，選用脆肉鯇，爽口鮮味，好討我歡喜！
***********************
 |
| 話梅小番茄心機之作 |
 |
| 有話梅味，味道剛好 |
小食半例就揀了一客
話梅小番茄 Sweet and Sour Plum Marinated Cherry Tomato （跟餐），粒粒鮮紅，仲去晒皮，心機之作。入口有些涼涼地，咬下去爆汁，吃到鹹鹹甜甜的話梅味，味道剛好，又無完全蓋了茄味，好吃到我連粒話梅都唔放過，推介！
 |
| 剁椒皮蛋又香又黏滑，但不火辣 |
還有一客兩件的剁椒皮蛋 Preserved Eggs with Chopped Pepper (跟餐）。皮蛋面放滿剁椒，還以為好火辣，又唔係喎！皮蛋呈溏心，又香又黏滑，不錯！
***********************
 |
| 時令蔬菜很新鮮，嫩口無渣 |
菜不能少，另單點了一客
時令蔬菜 Seasonal Vegetables （$18），選用正氣的菜心，好！大大碟，份量好足。每條菜心都很粗壯，灼的時間剛好，保持色澤翠綠，很新鮮，嫩口無渣，味道清新。
***********************
 |
| 芒果乳酪梳打冰涼透心，酸酸甜甜 |
友人要了一杯芒果乳酪梳打 Mango Yogurt Soda （跟餐特飲+$4/原價$26），話入口冰涼透心，味道酸酸甜甜，有助降火辣，岩晒！吃埋爆汁的芒果珠，更爽！ |
| 辣椒咖啡滲出少少辣，都幾特別 |
而我就越來越火辣，因為我想試下辣椒咖啡 Chili Coffee （跟餐特飲+$4/原價$28）。熱度十足，先嚐到咖啡香，再有些肉桂味，餘後就滲出少少辣，都幾特別！
-------------------------------
本來對米線無特別的喜愛，但原來它又白又滑，跟不同的配搭都夾，故不到今晚一試愛上。
店名：愛上米線
地址：旺角花園街1號鴻禧大廈地下6號舖
沒有留言:
張貼留言