細心

好殘！好殘！咩好殘？嗰樣好殘....忙於工作，已有一段長時間沒有做facial，今日總於頂唔順，專登出港島補一補。來到港島，當然要搵食，心想去咖啡室嘆嘆，但時間關係，今次要「快」！除了快餐，車仔麵也是「快」食之選。

麵店門面光鮮搶眼，佔地不少

裝潢都不簡單，看出多份心思

設計獨特

麵店的菜式相片

香港的街頭角落

麵店門面光鮮搶眼，佔地不少。內裏裝潢都不簡單，看出多份心思，有灣仔昔日面貌、有香港的街頭角落、有麵店的菜式相片、有字句等等，設計獨特。

地方光猛闊落

卡座寬敞舒適

中間的通道夠晒闊落

地方光猛闊落，一邊是一排四至六人的卡座，寬敞舒適；另一邊是一排泊牆的長櫈配四人枱，中間的通道夠晒闊落，是間環境不錯的車仔麵店。

點菜紙項目分得相當仔細

拿着密麻麻的點菜紙，真係要用點心機細看。項目分得相當仔細，共有六項，而部分項目仲有細目，分別有湯底、麵底、餸料、飲品和小食，唔想食車仔麵的話，仲有數款客飯選擇。

餸料有九大系列

餸料有九大系列，包括瑞士汁、古法滷水、清湯、麻辣、柱侯、咖哩、丸餃、港式和蔬菜，好多選擇，點揀好？

******************************

酸蘿蔔開胃解膩

好爽口，酸咪咪

先嚐一嚐枱上的酸蘿蔔，好爽口，酸咪咪，開胃解膩，作為開餐前小吃或配在麵上也是好選擇。

******************************

四爺老火湯車仔麵好豐富

我咁識補身，當然揀用四爺老火湯，是日是降火的皮蛋芫茜湯，近期生了飛滋，正合我需要。再健康啲，配菠菜麵（$24/少麵），有這選擇真岩我。餸料有瑞士滷豆腐（$10）、咖哩牛筋腩（$15）、蘆筍（$15）、竹笙和鮮准山（$15）。

四爺老火湯是皮蛋芫茜湯

不油不鹹，幾夠火喉

糖心皮蛋不錯！

菠菜麵有咬口且味道不錯

趁熱呷一口老火湯，啖啖芫茜獨有香味，不油不鹹，幾夠火喉，仲有兩件糖心皮蛋添，不錯！青綠的菠菜麵煮得岩，唔會太腍，有咬口且味道不錯，喜歡！

瑞士滷豆腐不會太鹹

嚐到豆香

牛腩好有咬口

牛筋滑嘟嘟

蘆筍幼嫩清爽

瑞士滷豆腐不會太鹹，嚐到豆香；牛腩好有咬口，而牛筋就滑嘟嘟，幾入味；蘆筍幼嫩清爽。

竹笙爽滑又索湯

准山爽口清新

喜歡大大條的竹笙，爽滑又索湯。准山也喜歡，夠晒爽口清新，可惜只有兩片，定價高！

******************************

腐乳通菜一向是最佳拍檔

通菜翠綠幼嫩

我是菜皇，當然要再加碟腐乳通菜（$20）。通菜色澤翠綠，莖部爽口，菜葉幼嫩，伴上鹹香惹味的腐乳，兩者一向是最佳拍檔。

******************************

熱檸蜜滋潤解膩

凡惠顧任何麵食都奉送熱飲一杯，部份飲物就要加錢。要了杯熱檸蜜（+$5），內有兩片檸檬，酸咪咪加了甜美的蜜糖，滋潤解膩。

---------------------------------------------

相信店主是個細心之人，由點單紙的細緻度起，至枱上的小吃，再加埋餸料分碟上，每part都好細心，提醒了自己，做事要細心，尤其是對自己的樣子，要細心看看它需要，不要臨到最後一刻才去補，太遲了...

店名：四爺車仔麵專門店

地址：灣仔莊士敦道25-33號長康大廈地舖