悠閒的週末

難得男朋友星期六放假，緊係要玩返日，但可惜….佢捉咗我去做運動。先去將軍澳體育館跑半嗰鐘，再去將軍澳海濱長廊散步，真係好健康呀! 

海濱長廊一帶勁多食肆

上層一間日本店

室內座位

室內座位

消耗完體力，緊係要食返餐好。近海濱長廊一帶勁多食肆，間間都好有feel，我地就揀了上層一間日本店。室內室外都有座位，裏面有卡座、面牆單人座和幾張兩人枱，而我地就揀咗坐室外，望住嗰景食更有feel。 

二人套餐

午巿定食

單點

極上刺身五點盛配壽司飯定食好豐富

午巿有一人和二人套餐，亦有單點。我地各自要了份午巿定食，每份定食都配有漬物、沙律、茶碗蒸和湯，都好豐富喎! 先上極上刺身五點盛配壽司飯定食($138)。

漬物酸咪咪，好醒胃

麵豉湯味道剛好

沙律簡單好味! 

茶碗蒸非常滑溜

漬物係腐皮大豆菜，味道酸咪咪，好醒胃，我好鍾意! 沙律就好新鮮清爽，仲有清甜的車厘茄，加咗少少甘香的胡麻醬，簡單好味! 茶碗蒸熱辣辣，雖然只有冬菇，用料唔多，但蛋非常滑溜，味道仲好岩。麵豉湯暖笠笠，味道剛好，內有香滑的豆腐和爽滑的昆布，唔錯!

賣相好正，件件都幾厚身

油甘魚柔軟鮮美

劍魚腩更肥美

極上刺身五點盛配壽司飯定食($138)賣相好正，分別有油甘魚、刺身帶子、鏗魚、劍魚腩和三文魚，仲配了一大碗壽司飯，啲飯粒粒圓潤，好有口感，估計是日本珍珠米，仲加咗壽司醋，好食! 五點刺身件件都幾厚身，我就最喜歡油甘魚，啖啖魚油香，柔軟鮮美；劍魚腩就更肥美，充滿油光，鮮味油潤，柔軟微爽，正! 刺身帶子就好柔軟黏滑，味道鮮甜。 

壽喜燒牛肉烏冬定食熱度十足，份量都十足

牛肉連住少少油脂和筋，好有咬口

烏冬滑嘟嘟又彈牙

再嚟一份壽喜燒牛肉烏冬定食 ($118)，熱度十足，份量都十足，正! 每片牛肉都幾嫩，仲連住少少油脂和筋，好有咬口，係我最喜歡。烏冬滑嘟嘟又彈牙，跟甜甜地的壽喜燒湯，再加埋啲爽口的日本菇和昆布大羹食就更美味。 

柑桔蜜好滋潤順喉

飲品都幾多選擇，加錢要了兩杯熱柑桔蜜(+$10)，入口暖笠笠，味道酸酸甜甜，好滋潤順喉，唔錯!