對自己好啲

間中豪食一餐，對自己好啲係自己的責任，所以今晚就同男朋友Happy Friday 去食餐好。

神秘的門面顯得特別起眼

座位唔多，所以訂定位最穩陣

今餐揀了食鐵板燒，店舖在街巷的轉角位，神秘的門面顯得特別起眼。入到裏面，嘩! 設計好酷呀! 除了有張鐵板枱外，還有幾張二至四人枱，座位唔多，所以訂定位最穩陣，男朋友就醒目。 

鐵板set

鐵板set

單點菜式

單點菜式

有幾款鐵板餐外，還有一些單點菜式。今晚我哋揀了入門廚師發板套餐($588/五道菜)，對我哋來講已經係豪食。五道菜有沙律、兩款海鮮、一款肉、炒飯和甜品。 

有酒水供應

美人梅酒酒味較濃，唔會太甜

有美食自然要有美酒，選了一支美人梅酒($128/300ml)，配一對高貴的小酒杯，高級晒! 冰涼透心，酒味較濃，淡淡梅味，唔會太甜，岩晒我男朋友的口味，其實我仲飲得多過佢，哈!

沙律好新鮮清爽

第一道是沙律，沙律菜好新鮮清爽，底層配了黑醋而面層就淋了柚子醋，好有心思，雙重酸咪咪，食落更清新。還有甜美多汁的鮮菠蘿配鹹香的煙三文魚，原來都好夾，好食!

入門廚師發板套餐

鐵板燒開始

鐵板燒開始，可惜今晚訂唔到鐵板枱，只有遠距離望，但間中都忍唔位走近一啲…….鐵板海鮮兩品，兩個人即是有四款，我地要咗兩份東星斑、一份北海道元貝和一份白鱔。

入門廚師發板套餐及北海道帶子刺身白膳一流；北海道帶子刺身高質

北海道元貝就配牛油黑松露；東星斑配柚子黑醋

嘩! 好有心思的擺碟，而每份主菜都有不同的配搭。東星斑配柚子黑醋，皮脆肉嫩，都幾鮮味，但魚油唔多；厚身的北海道元貝半浸牛油黑松露，滿有牛油香；白鱔配七味粉和竹炭鹽，但本身已鹹香入味，相當脆口，又有油香。另叫一客北海道帶子刺身 ($138)，刺身級配上黑魚籽醬，好矜貴！肉質極鮮嫩，優質！ 

澳洲牛柳牛味濃，腍嫩

宮城縣黑豚扒配菠蘿辣菜汁、特濃蒜香牛油

鐵板肉類各人一品，兩款賣相都精美。五成熟的澳洲牛柳牛味香濃，肉嫩多汁，正！宮城縣黑豚扒肉質紮實，但不嚡口，配菠蘿辣菜汁、特濃蒜香牛油，各有特色！

炒飯粒粒分明

炒飯粒粒分明，炒得乾身而不油膩，還有隻夾彈的大蝦。 

豆腐雪糕配紅豆爆珠相當特別

是日甜品是豆腐雪糕配紅豆爆珠，濃濃的豆腐香，冰凍幼滑，紅豆爆珠相當特別，好吃！

 

店名：龍亭

地址：佐敦寧波街27-31號地下A-D號舖