入秋第一煲

友人去觀塘跳舞，話約埋我，之後再食埋晚飯，仲話今年都未開爐，是時候啦!唔……跳舞就……唔好預我，去打邊爐就好樂意，真係成日掛住食。

門面光鮮

光猛新淨

長方形格局，地方都幾大

一排排舒適的沙發座

提醒大家要愛惜和愛護牠們

她揀了一個新店，門面光鮮，大型的玻璃窗，可清楚看到內裏的環境。內裏光猛新淨，長方形格局，地方都幾大，靠牆設有一排排舒適的沙發座，還有幾張闊落的卡座和多張二至四人枱，可容納不少客人，亦坐得挺舒適。最吸引我是牆上的竉物牆紙，好可愛呀! 仲提醒大家要好好愛惜和愛護牠們，難道店主是愛竉物之人?

冇限時火鍋!! 正!! 

特惠添加

看看貼在門口的餐牌，冇限時火鍋!! 正!! 咁就唔駛擔心究竟食嘢好?還是傾計好? 有兩個套餐供應，分別是為食套餐(成人$268)和豪食套餐(成人$338)，如果再想追加牛肉或刺身，就可以特惠添加。既然難得一聚，一於食好啲，就揀後者。

豪食套餐非常豐富

豪食套餐(成人$338+10%)非常豐富，有任點小食六款、前菜五點刺身盛合、時令燉湯、二選一頭盤、火鍋盛宴、是日6-8款豪食海鮮拼盤、8款豪食牛肉拼盤、我不是配角、田園自助吧和任飲非酒精飲品。有一個小規則，就是要按次序點菜，唔可以點返轉頭呀!

大雪櫃取飲品

兩款都好岩打邊爐

在未下單前， 先走去大雪櫃取飲品， 有各式汽水、韓式飲品、凍茶、涼茶等等，取了一支酸酸甜甜的山楂蘋果美顏茶，可消滯解膩；一罐解茶，可解油解膩，兩款都好岩打邊爐。

***********************************

蟹籽沙律簡單而美味

首先要點小食，六款中只點了蟹籽沙律，因為要留肚食其他美食。幼長的青瓜絲好清爽，跟蟹籽沙律醬拌勻同吃，簡單而美味。

***********************************

五點刺身盛合色澤亮麗，好新鮮

牡丹蝦大大隻，鮮甜黏爽

接着上枱是五點刺身盛合，全部色澤亮麗，好新鮮。有爽口彈牙的北寄貝、肥美油潤的三文魚、脆卜卜的希靈魚、鮮甜柔軟的帶子，還有最討我喜歡的牡丹蝦，大大隻，鮮甜黏爽，正!

***********************************

蟲草花雞腳豬骨燉湯味道鮮香，好喝！

落足料燉製

緊接是時令燉湯，今日係蟲草花雞腳豬骨燉湯。原盅上枱，熱度十足，一揭開蓋子，陣陣香氣。舀幾舀，有滑嘟嘟的雞、鮮香的豬肉、爽口鮮香的蟲草花，還有紅棗杞子，落足料燉製，絕不欺場，難怪味道如此鮮香，好喝！

***********************************

任食寵寵少辣雞煲大大煲好豐富

打開炒幾炒，重覆4次

是時候食二選一頭盤，所謂的頭盤，竟然是酸菜魚或雞煲，其實係咪已經是主菜啦? 哈!我倆揀了任食寵寵少辣雞煲，無錯! 係任食，真係唔駛驚食唔飽。待一會，大大鍋的雞煲就上枱，除了有大量雞件外，還配了很多紫洋蔥、芫茜等，大大煲好豐富。店員指示蓋蓋子2分鐘，打開炒幾炒，重覆4次，共8分鐘就食得。

肉質嫩滑，烹調入味，味道香辣

吱吱喳喳立刻開動，每件雞均連帶着黃油雞皮，肉質之間亦夾雜着少少黃油脂肪，滑溜且肥美，而近骨的部份，就更加嫩滑，而且烹調入味，味道香辣，好吃！別忘記仲有索晒汁的紫洋蔥和芫茜，都好好味。

**************************************

準備醬料

準備醬料

黃金皮蛋芫茜湯下下火

雞鍋吃得七七八八，是時候換上火鍋盛宴。有4款火鍋湯底，食完辣雞煲當然要下下火，就揀黃金皮蛋芫茜,湯啦! 趁還未滾起，先去準備醬料，有芫茜、蔥花、指天椒、炸蒜、蒜茸和豉油，我就差不多樣樣加齊。

**************************

豪食海鮮拼盤七款都好新鮮

特別喜歡龍躉片和脆肉鯇

全部都優質

先來一大盤豪食海鮮拼盤，有蟶子、BB象拔蚌、龍躉片、脆肉鯇、蠔、蜆和鮮蝦，的確豪食，好滿足！七款都好新鮮，味道鮮美，特別喜歡嫩滑的厚切龍躉片、爽脆的脆肉鯇、鮮甜爽彈的大蝦和超爽甜的蟶子，全部都優質，令我倆都吃得津津有味。

**************************

豪食牛肉拼盤好新鮮，油脂分佈平均

豪食牛肉拼盤亦同時上枱，幸好每款牛均有一塊名牌，否則都不知邊樣打邊樣，真細心。是日有手切牛頸脊、美國SRF和牛板腱肉、熊本雪花一口牛、潮汕吊龍伴和黃喉。前四款都色澤紅潤，好新鮮，油脂分佈平均。

牛味濃，優質!

我最喜歡是美國SRF和牛板腱肉，其佈滿雪花紋，油脂分佈平均。 涮一會，嫩肉中夾雜着油潤的肥膏，好嫩滑，且牛味濃，優質! 而熊本雪花一口牛就很討友人歡喜，每粒都夾雜肥膏和肉筋。涮一涮，油潤兼有嚼勁，牛味香濃，正!

**************************

我不是配角

再來我不是配角，上了一板五片的鹿兒島茶美豚， 片片薄切得透底，鮮紅亮澤，挺新鮮。肉中夾雜着一層層肥膏，看起來有點肥膩，但經涮後，吃起來並不覺油膩，而肉質相當腍嫩，肉味香，好吃!

三款丸都相當彈牙，滿有驚喜

還有三丸三餃，有蟹籽沙律丸、竉竉濃汁牛肉丸、流心芋茸貢丸、手工一口韭菜餃，魚皮餃和手工一口雲吞。三款丸都相當彈牙，口感一流， 而每咬一口都滿有驚喜。蟹籽沙律丸內有蟹籽沙律醬，吃到脆卜卜的蟹籽，味道 鹹香；竉竉濃汁牛肉丸真係存有濃汁，牛味好香濃；流心芋茸貢丸內藏粉綿的芋茸，鹹甜交雜，好特別，必食推介!

三款餃都皮薄饀靚

三款餃雖然細細粒，但粒粒都皮薄饀靚，脹卜卜。我最喜歡是手工一口韭菜餃，香味十足，肉中又沒有肥膏，讚!

***************************

田園自助吧擺放得整整齊齊

大部份都好新鮮

吃了咁多肉，當然要吃返啲蔬菜。出發去田園自助吧，擺放得整整齊齊，除了有雜錦蔬菜盆之外，還有不同的菇菌、鮮腐竹、蓮藕片、粟米、炸芋條等等，大部份都好新鮮。當中較喜歡是清甜多汁的粟米、滿有豆香的鮮腐竹和翠綠爽嫩的油麥菜。

新淮山又新鮮又爽嫩

另再點一客是新淮山，每條厚度大小相若。白雪雪的新淮山涮一涮，又新鮮又爽嫩；涮耐一點，腍身一點，帶些黏性，同樣好吃。

*****************************

雙皮燉奶滑嘟嘟，甜度適中

飯後點可以沒有甜品，原來只要讚好本店面書就即賞自家製時令甜品一客，今日雙皮燉奶，燉奶都已經好考功夫，仲要是雙皮燉奶，真係有心機。白雪雪，滑嘟嘟，奶味不算太濃，甜度適中，很合我口味，吃完都覺得啲皮膚滑咗，哈!

----------------------------

12月還是入秋? 無錯! 二十多度都不覺得是冬天，但此刻才是入秋第一煲，真係有啲遲，嚟緊要食多幾煲，跟家人、朋友圍埋一齊煲，慢慢傾慢慢食，就是簡單的快樂。

店名：為食火鍋公司

地址：觀塘創業街15號萬泰利廣場地下C號舖