聖誕大餐

稍有不慎，張了金口話請友人吃聖誕大餐。大家都知啦，節日期間必定...真係好擔心嗰荷包。究竟朋友會揀去食乜？自助餐？法國菜？廚師發辦？點知...她竟然去食車仔麵，一向都知她愛吃車仔麵，但冇諗過作為聖誕大餐。

一身紅通通，好應節

牆上那幅油畫既具代表性又很美

地方不算大，但整齊企理

麵店一身紅通通，好應節，難道友人是因為咁而揀它？走進內裏，裝潢簡約平實，但牆上那幅油畫很吸睛，既具代表性又很美。地方不算大，但整齊企理。設有兩行座位，右邊有三張四人卡座，較為舒適闊落，而右邊就是一排長沙發座配幾張四人枱。

貼在牆上的餐牌

看看貼在牆上的餐牌，先在十一款麵底中挑選，至於配料就多得令人眼花撩亂，仲有些不少飲品和一些風味小食選擇。

********************************************

自助形式，在門口點菜

秘製辣醬及魔鬼辣醬

採用自助形式，客人在門口點菜。我今日較大食，點了一碗六餸菠菜麵，而友人比我更好胃口，要七餸米粉，再加兩杯飲品。睇吓，幾豐富的聖誕大餐！

 

六餸菠菜麵

加辣醬

加少許秘製辣醬，嚐到少許香辣

魔鬼辣醬越食越火辣

六餸菠菜麵（$64）每款餸料都有三至四件，青綠的菠菜麵(+$3)煮得岩，唔會太腍，有咬口且味道不錯，喜歡！先加少許秘製辣醬，嚐到少許香辣，大啖吃也不怕，最滋味！仲試埋魔鬼辣醬，真的別看輕它呀！辣味慢慢滲出，越食越火辣，越食越惹味，愛辣者必定吃得好滋味。

冬菇厚身爽口，滿有菇香

韭菜翠綠爽嫩

鮮枝竹又腍又滑身

牛腩不算很腍嫩

六餸有切件的冬菇，雖非原隻上枱，但都很厚身，滿有菇香兼爽口，不錯! 韭菜份量也不少，條條翠綠爽嫩，富獨有的香味，好吃！滷水鮮枝竹又腍又滑身，滿有豆香，加些魔鬼辣醬，更滋味！牛腩切成細細件，易於入口，雖不算很腍嫩，但絶不嚡口，而且烹調入味， 也不錯！

菜心鮮嫩清爽

溏心蛋非常美味

油菜揀了菜心，煮弄時間剛好，保持翠綠色澤，鮮嫩清爽，不油不鹹，清新健康。最喜歡是溏心蛋蛋白口感彈滑，色澤亮麗的蛋黃汁液富黏性，充滿蛋香，的確非常美味。

********************************************

七餸米粉很豐富

友人話最愛吃麵筋

友人所揀的七餸米粉（$72）有麵筋、蟹柳、駛名辣魷魚、芝士腸、豬皮、菜肉餃和古法豬紅配米粉。友人話最愛吃麵筋和豬紅，看她吃得津津有味，必定喜歡。

*******************************************

熱檸蜜滋潤解膩

冰啡樂甜中帶苦，很特別！

我要杯熱檸蜜（$9），內有兩片檸檬，酸咪咪加了甜美的蜜糖，滋潤解膩。友人一見到冰啡樂（$13/跟餐）就話要飲。可樂加咖啡！？真係未試過，究竟係點？店員端上半杯咖啡和一罐可樂。自行將兩者混合，試啜幾口，甜中帶苦，帶氣的咖啡，很特別！

------------------------------------

車仔麵也是聖誕大餐

聖誕大餐不需要很昂貴，亦不需要擺滿食物，最重要是大家一齊吃喜歡的食品，那自己吃得開心，車仔麵也是聖誕大餐呀！

店名：來多碗車仔麵

地址：荃灣路德圍42號安富大厦地下5號舖